घणसोली : आक्षेपार्ह व्हिडिओ प्रसारित करण्याची धमकी देऊन महिला जिम पार्टनरकडून ३८ लाख रुपये उकळल्याचा आरोप असलेल्या जिम चालकाला रबाळे पोलिसांनी अटक केली आहे. विवेक पाटील असे आरोपीचे नाव असून, या प्रकरणाचा पुढील तपास रबाळे पोलीस करत आहेत.
मिळालेल्या माहितीनुसार, आरोपी विवेक पाटील आणि तक्रारदार महिला हे जिम व्यवसायात भागीदार होते. आक्षेपार्ह व्हिडिओ प्रसारित करण्याची धमकी देऊन आरोपीने आपल्याकडून पैसे उकळल्याची तक्रार महिलेने पोलिसांकडे केली आहे. वारंवार पैशांची मागणी करण्यात आल्याचाही उल्लेख तक्रारीत करण्यात आला आहे.
या तक्रारीच्या आधारे रबाळे पोलिसांनी कारवाई करत विवेक पाटील याला अटक केली. या प्रकरणात न्यायालयाने आरोपीला दोन दिवसांची पोलीस कोठडी सुनावली आहे. वरिष्ठ पोलीस निरीक्षक बाळकृष्ण सावंत यांच्या मार्गदर्शनाखाली रबाळे पोलीस या प्रकरणाचा पुढील तपास करत आहेत.
या प्रकरणातील आरोपांची पडताळणी तपासादरम्यान केली जाणार असून, कथित आर्थिक व्यवहार आणि धमक्यांबाबत अधिक माहिती पोलीस तपासातून समोर येण्याची शक्यता आहे.
