नाशिकच्या इंदिरानगर परिसरातील जॉगिंग ट्रॅकची अवस्था सततच्या पावसामुळे अत्यंत दयनीय झाली आहे. ट्रॅकवर चिखल आणि पाण्याची डबकी साचल्याने नागरिक, ज्येष्ठ नागरिक आणि व्यायामप्रेमींना मोठ्या गैरसोयीचा सामना करावा लागत आहे.
स्थानिकांच्या म्हणण्यानुसार, या जॉगिंग ट्रॅकचा वापर सकाळ-संध्याकाळ नियमितपणे फिरण्यासाठी आणि व्यायामासाठी केला जातो. मात्र, साचलेल्या पाण्यामुळे आणि चिखलामुळे ट्रॅकवर चालणेही अवघड झाले असून घसरून अपघात होण्याची भीती व्यक्त केली जात आहे.
याच मार्गाचा वापर शाळकरी विद्यार्थीही दररोज ये-जा करण्यासाठी करत असल्याने त्यांनाही चिखल आणि पाण्यामुळे अडचणी निर्माण होत आहेत. त्यामुळे नागरिकांनी संबंधित यंत्रणेकडे तातडीने दुरुस्तीची मागणी केली आहे.
ट्रॅकची दुरुस्ती करून पाण्याचा योग्य निचरा करण्याची व्यवस्था करावी, जेणेकरून नागरिक आणि विद्यार्थ्यांना सुरक्षितपणे या मार्गाचा वापर करता येईल, अशी मागणी स्थानिकांकडून करण्यात आली आहे.
