बारामती : उजनी प्रकल्प परिसरातील प्रस्तावित न्यूक्लिअर प्लांट आणि डेटा सेंटरच्या मुद्द्यावरून आमदार रोहित पवार यांनी विरोध दर्शवला आहे. या दोन्ही प्रकल्पांना विरोध करणाऱ्या शेतकऱ्यांच्या आंदोलनाला त्यांनी पाठिंबा दिला असून, सरकारने प्रकल्प रद्द करण्याची मागणी केली आहे.
प्रकल्पासाठी केवळ अर्धा टीएमसी पाण्याचा वापर होणार असल्याचा सरकारचा दावा रोहित पवार यांनी फेटाळला. प्रस्तावित डेटा सेंटरमुळे मोठ्या प्रमाणावर पाणी आणि विजेचा वापर होण्याची शक्यता असल्याचे त्यांनी म्हटले आहे. तसेच या प्रकल्पांमधून स्थानिक नागरिकांना अपेक्षित रोजगार मिळणार नसल्याची भीतीही त्यांनी व्यक्त केली.
उजनी प्रकल्पातील पाण्याच्या वापराचा मुद्दा आणि स्थानिक रोजगाराचा प्रश्न उपस्थित करत रोहित पवार यांनी शेतकऱ्यांच्या मागण्यांना पाठिंबा दिला आहे. सरकारने प्रस्तावित प्रकल्प रद्द न केल्यास आंदोलन अधिक तीव्र करण्याचा इशाराही त्यांनी दिला आहे. त्यामुळे उजनी परिसरातील प्रस्तावित प्रकल्पांवरून शेतकरी आणि सरकार यांच्यातील संघर्षाचा मुद्दा चर्चेत आला आहे.
