उपवासाच्या दिवसात नेहमीचे पदार्थ खाऊन कंटाळा आला असेल, तर या भागात दोन चविष्ट आणि सोप्या उपवासाच्या रेसिपीज पाहायला मिळणार आहेत. ‘आपलं डायट’ या रेसिपी मालिकेत डायटिशियन पूजा देवरे यांनी उपवासाचे आप्पे आणि रताळ्याचा शिरा तयार करण्याची पद्धत सांगितली आहे.
उपवासाचे आप्पे तयार करण्यासाठी भगर भिजवून त्याचे मिश्रण तयार केले जाते. त्यामध्ये शेंगदाण्याचा कूट, मिरची, कोथिंबीर, मीठ आणि जिरे यांचा वापर करण्यात येतो. आवडीनुसार काकडी किंवा लाल भोपळ्याचाही समावेश करता येतो. आप्पे पात्रात तुपाने ग्रीसिंग करून हे आप्पे दोन्ही बाजूंनी खमंग भाजले जातात. हे आप्पे हिरव्या चटणीसोबत सर्व्ह करता येतात.
यानंतर दुसरी रेसिपी म्हणजे रताळ्याचा उपवासाचा शिरा. उकडलेले रताळे मॅश करून किंवा किसून तुपावर खमंग भाजले जातात. त्यामध्ये वेलची पावडर घालून चव वाढवली जाते. रताळे नैसर्गिकरित्या गोड असल्याने साखर किंवा गूळ आवश्यकतेनुसार कमी प्रमाणात वापरता येतो.
उपवासासाठी घरच्या घरी सहज तयार करता येतील अशा या दोन रेसिपीज नक्की ट्राय करा आणि अशाच आणखी चविष्ट रेसिपीजसाठी पाहत राहा आपलं नाशिक | आपलं डायट.
आपलं नाशिक | आपला आवाज
