काम पूर्ण होण्याआधीच काँक्रिट रस्त्याला तडे; ९ कोटी ७७ लाखांच्या कामाच्या गुणवत्तेवर प्रश्नचिन्ह
गंगावाडी ते कालवी रस्त्याच्या काँक्रिटीकरणाचे काम पूर्ण होण्याआधीच रस्त्याला तडे गेल्याने कामाच्या गुणवत्तेवर गंभीर प्रश्न उपस्थित झाले आहेत. मुख्यमंत्री ग्रामसडक योजनेअंतर्गत तब्बल ९ कोटी ७७ लाख रुपये खर्चून हे काम करण्यात येत असल्याने आता या रस्त्याच्या दर्जाबाबत चौकशीची मागणी जोर धरू लागली आहे.
रस्त्याचे काँक्रिटीकरण सुरू असतानाच आणि काम पूर्ण होण्यापूर्वीच तडे दिसून आल्याने नागरिकांमध्ये नाराजी व्यक्त केली जात आहे. कोट्यवधी रुपयांचा निधी खर्च करून करण्यात येणाऱ्या विकासकामाची ही अवस्था असेल, तर कामाच्या दर्जाची तपासणी झाली का, असा सवाल उपस्थित केला जात आहे.
मुख्यमंत्री ग्रामसडक योजनेतील या महत्त्वाच्या रस्त्याच्या कामात वापरण्यात आलेले साहित्य, कामाची पद्धत आणि गुणवत्ता नियंत्रणाची प्रक्रिया याबाबत सखोल चौकशी करण्यात यावी, अशी मागणी करण्यात येत आहे.
काम पूर्ण होण्याआधीच रस्त्याला तडे गेल्याने संबंधित ठेकेदाराच्या कामाची चौकशी करून दोषी आढळल्यास योग्य ती कारवाई करण्यात यावी, अशी मागणीही होत आहे.
गंगावाडी ते कालवी रस्ता परिसरातील नागरिकांसाठी महत्त्वाचा असल्याने रस्त्याचे काम दर्जेदार आणि टिकाऊ असणे आवश्यक आहे. मात्र सुरुवातीलाच तडे गेल्याने या रस्त्याच्या भविष्यातील टिकाऊपणाबाबत प्रश्न निर्माण झाले आहेत.
आता या प्रकरणाची चौकशी करून रस्त्याच्या कामातील त्रुटी शोधल्या जाणार का? संबंधित ठेकेदारावर कारवाई होणार का? आणि ९ कोटी ७७ लाखांच्या या कामाची गुणवत्ता पुन्हा तपासली जाणार का? याकडे नागरिकांचे लक्ष लागले आहे.
आपलं नाशिक | आपला आवाज
