नाशिकच्या पेठ तालुक्यात आज सकाळी ९ वाजता सौम्य भूकंपाचे धक्के जाणवले.
गोंदे, करंजाळी, भायगाव, देवगाव, आडगाव भुवन आणि एकदरे परिसरात जमीन हादरल्याने नागरिकांमध्ये काही काळ भीतीचे वातावरण निर्माण झाले.
अचानक जाणवलेल्या धक्क्यांनंतर काही नागरिक खबरदारी म्हणून घराबाहेर आले.
सुदैवाने या भूकंपामुळे कोणतीही जीवितहानी झाल्याची माहिती नाही.
तसेच मोठी वित्तहानी, इमारतींची पडझड किंवा इतर गंभीर नुकसान झाल्याचे वृत्त अद्याप समोर आलेले नाही.
भूकंपाचे धक्के जाणवल्यानंतर प्रशासनाकडून परिस्थितीवर लक्ष ठेवण्यात येत आहे.
नागरिकांनी घाबरून न जाता खबरदारी घ्यावी आणि अधिकृत यंत्रणांकडून मिळणाऱ्या माहितीलाच प्राधान्य द्यावे, असे आवाहन करण्यात आले आहे.
सोशल मीडिया किंवा इतर माध्यमांमधून पसरणाऱ्या अफवांवर विश्वास ठेवू नये, असेही प्रशासनाकडून सांगण्यात आले आहे.