नाशिकच्या सार्वजनिक वाहतूक व्यवस्थेला मोठी चालना देणारा महत्त्वाचा निर्णय घेण्यात आला आहे. पीएम ई-बस सेवा योजनेअंतर्गत नाशिक सिटी लिंक आणि जेबीएम इकोलाईफ मोबिलिटी यांच्यात ५० वातानुकूलित (AC) इलेक्ट्रिक बस पुरवण्यासाठी १० वर्षांचा करार करण्यात आला आहे.
मुख्यमंत्री देवेंद्र फडणवीस यांच्या वाढदिवसानिमित्त या उपक्रमाची घोषणा करण्यात आली. आगामी सिंहस्थ कुंभमेळा २०२७ लक्षात घेऊन शहरातील सार्वजनिक वाहतूक अधिक सक्षम, सुरक्षित आणि आधुनिक करण्याच्या दृष्टीने हा महत्त्वाचा टप्पा मानला जात आहे.
महापौर हिमगौरी आडके यांनी सांगितले की, नवीन इलेक्ट्रिक बसमुळे नागरिकांना आरामदायी, वातानुकूलित आणि पर्यावरणपूरक प्रवासाची सुविधा मिळेल. तसेच कुंभमेळ्यादरम्यान लाखो भाविकांच्या वाहतुकीचा ताण कमी करण्यासही या बस उपयुक्त ठरणार आहेत.
इलेक्ट्रिक बसमुळे इंधनावरील खर्च कमी होण्याबरोबरच वायू प्रदूषणात घट होईल आणि नाशिकच्या हरित व शाश्वत सार्वजनिक वाहतूक व्यवस्थेला बळ मिळेल.
