रत्नागिरी : रत्नागिरी जिल्ह्यात सुरू असलेल्या मुसळधार पावसामुळे खेड तालुक्यातील आपेडे गावातील मोरेवाडीत भूस्खलनाचा धोका निर्माण झाला आहे. परिसरातील जमिनीला मोठमोठे तडे गेल्याने तब्बल 15 घरांवर दरड कोसळण्याची भीती व्यक्त करण्यात येत आहे. या घटनेमुळे ग्रामस्थांमध्ये भीतीचे वातावरण निर्माण झाले असून प्रशासनाने तातडीने घटनास्थळी धाव घेतली आहे.
मुसळधार पावसामुळे मोरेवाडी परिसरातील जमिनीची धूप वाढली असून अनेक ठिकाणी मोठे तडे पडल्याचे दिसून आले आहे. तड्यांची तीव्रता दिवसेंदिवस वाढत असल्याने स्थानिक नागरिकांमध्ये चिंतेचे वातावरण आहे. संभाव्य दरड कोसळण्याच्या भीतीने अनेक कुटुंबांनी सुरक्षिततेच्या दृष्टीने सतर्कता बाळगण्यास सुरुवात केली आहे.
घटनेची माहिती मिळताच महसूल प्रशासन, आपत्ती व्यवस्थापन पथक आणि स्थानिक अधिकारी यांनी घटनास्थळी भेट देऊन परिस्थितीचा आढावा घेतला. संभाव्य धोका लक्षात घेऊन नागरिकांना आवश्यक असल्यास सुरक्षित स्थळी स्थलांतरित करण्याची तयारी प्रशासनाकडून सुरू करण्यात आली आहे.
प्रशासनाने नागरिकांना सतर्क राहण्याचे आवाहन केले असून परिसरावर सातत्याने नजर ठेवली जात आहे. दरम्यान, मुसळधार पावसाचा जोर कायम राहिल्यास परिस्थिती आणखी गंभीर होण्याची शक्यता व्यक्त केली जात आहे.
