कल्याणमधील दिवंगत नेते वसंत डावखरे यांच्या मानहानी प्रकरणाचा तब्बल १७ वर्षांनंतर निकाल लागला आहे. २००९च्या लोकसभा निवडणुकीदरम्यान समोर आलेल्या कथित व्हिडिओ आणि सीडी प्रकरणातून हा खटला सुरू झाला होता. कल्याण न्यायालयाने उद्धव ठाकरे, एकनाथ शिंदे, आनंद परांजपे आणि रमाकांत देवळेकर या चौघांची निर्दोष मुक्तता केली आहे.
२००९च्या कल्याण लोकसभा निवडणुकीदरम्यान एका निवडणूक सभेत कथित व्हिडिओ दाखवण्यात आल्याच्या प्रकरणावरून वसंत डावखरे यांनी मानहानीची तक्रार दाखल केली होती. त्यानंतर संबंधित आरोपींविरोधात न्यायालयीन प्रक्रिया सुरू झाली. या प्रकरणाची सुनावणी तब्बल १७ वर्षे सुरू होती.
या खटल्याच्या सुनावणीदरम्यान २० पेक्षा अधिक साक्षीदारांच्या साक्षी नोंदवण्यात आल्या. यामध्ये पोलिस अधिकारी आणि तपासी अधिकाऱ्यांचाही समावेश होता. उद्धव ठाकरे आणि एकनाथ शिंदे यांनी यापूर्वी व्हिडिओ कॉन्फरन्सिंगद्वारे न्यायालयात आपले जबाब नोंदवले होते.
कथित सीडी, तिच्यातील एडिटिंग, फॉरेन्सिक अहवाल आणि तपास प्रक्रियेबाबत बचाव पक्षाकडून न्यायालयात मुद्दे मांडण्यात आले होते. आरोपींचा या प्रकरणाशी थेट संबंध असल्याचा ठोस पुरावा नसल्याचा दावा बचाव पक्षाने केला होता.
तब्बल १७ वर्षांच्या न्यायालयीन प्रक्रियेनंतर कल्याण न्यायालयाने या प्रकरणाचा निकाल देत उद्धव ठाकरे, एकनाथ शिंदे, आनंद परांजपे आणि रमाकांत देवळेकर या चौघांची निर्दोष मुक्तता केली. या निकालामुळे २००९पासून सुरू असलेल्या या प्रकरणाची न्यायालयीन प्रक्रिया संपली आहे.
