नाशिकच्या जेलरोड परिसरातील मॉडेल कॉलनीमध्ये स्ट्रीट लाईटच्या वायरिंगला अचानक आग लागल्याची घटना समोर आली आहे. सायंकाळच्या वर्दळीच्या वेळी वायरिंगमधून धूर निघू लागल्यानंतर काही वेळातच आगीने पेट घेतल्याने परिसरात एकच खळबळ उडाली.
घटनेची माहिती मिळताच परिसरातील नागरिकांनी तत्काळ सुरक्षित अंतर राखले. यानंतर संबंधित यंत्रणा आणि अग्निशमन दल घटनास्थळी दाखल झाले. अग्निशमन दलाने वेळीच कारवाई करत आग आटोक्यात आणली, त्यामुळे मोठी दुर्घटना टळली.
प्राथमिक माहितीनुसार, ही आग शॉर्ट सर्किटमुळे लागल्याचा अंदाज व्यक्त करण्यात आला आहे. या घटनेत कोणतीही जीवितहानी किंवा वित्तहानी झालेली नसल्याची माहिती समोर आली आहे.
दरम्यान, अशा प्रकारच्या घटना टाळण्यासाठी स्ट्रीट लाईटची वायरिंग आणि विद्युत यंत्रणेची नियमित तपासणी व देखभाल करण्यात यावी, अशी मागणी स्थानिक नागरिकांनी संबंधित प्रशासनाकडे केली आहे.
