नाशिक जिल्ह्यातील येवला तालुक्यातील आंगणगाव येथे एटीएसने स्फोटकांचा मोठा साठा जप्त केल्यानंतर तपासाला वेग आला आहे. या प्रकरणाच्या पुढील तपासात संशयिताकडे असलेल्या स्फोटकांच्या परवान्याबाबत महत्त्वाची माहिती समोर आल्याचे सांगण्यात येत आहे.
प्राथमिक तपासानुसार, संशयिताकडील स्फोटकांचा परवाना मुदतबाह्य असल्याचे आढळून आले आहे. त्याचबरोबर हा परवाना संशयिताच्या स्वतःच्या नावावर नसून दुसऱ्याच व्यक्तीच्या नावावर असल्याची माहिती तपासात समोर आली आहे. त्यामुळे स्फोटकांचा साठा नेमका कोणत्या परवान्याच्या आधारे ठेवण्यात आला होता आणि त्याचा वापर कोणत्या कारणासाठी करण्यात येत होता, याबाबत तपास यंत्रणांकडून चौकशी केली जात आहे.
या प्रकरणात स्फोटकांचा पुरवठा करणाऱ्या यंत्रणेचाही तपास सुरू करण्यात आला आहे. स्फोटकांचा पुरवठा करणारा घाऊक विक्रेता एटीएसच्या रडारवर असून, त्याच्याकडून स्फोटके कोणाला, किती प्रमाणात आणि कोणत्या कागदपत्रांच्या आधारे पुरवण्यात आली, याची माहिती तपासली जात आहे.
स्फोटकांचा मोठा साठा आढळून आल्यानंतर एटीएसकडून या प्रकरणातील प्रत्येक दुवा तपासला जात आहे. स्फोटकांची खरेदी, वाहतूक, साठवणूक आणि परवाना यासंदर्भातील कागदपत्रांची पडताळणी करण्यात येत आहे. त्यामुळे या प्रकरणाचा तपास केवळ जप्त केलेल्या साठ्यापुरता मर्यादित न राहता स्फोटकांच्या पुरवठा साखळीपर्यंत पोहोचण्याची शक्यता व्यक्त केली जात आहे.
दरम्यान, मुदतबाह्य परवाना आणि दुसऱ्या व्यक्तीच्या नावावरील परवान्याचा वापर झाल्याचे तपासात स्पष्ट झाल्यास या प्रकरणात आणखी कोणावर कारवाई होते, तसेच घाऊक विक्रेत्याकडून तपासात कोणती माहिती समोर येते, याकडे आता लक्ष लागले आहे.
