नंदुरबार शहरात पोलिसांनी मोठी कारवाई करत घराच्या छतावर लपवून ठेवलेल्या सात धारदार तलवारी जप्त केल्या आहेत. या प्रकरणी एका ३० वर्षीय तरुणाला अटक करण्यात आली असून, हत्यार कायद्यानुसार गुन्हा दाखल करण्यात आला आहे.
नंदुरबारच्या चिराग गल्ली परिसरात ही कारवाई करण्यात आली. पोलिसांना मिळालेल्या गोपनीय माहितीनुसार संबंधित घरावर छापा टाकण्यात आला. यावेळी पोलिसांनी घराच्या छताची झडती घेतली.
झडतीदरम्यान छतावर लपवून ठेवलेल्या सात धारदार तलवारी पोलिसांच्या हाती लागल्या. जप्त करण्यात आलेल्या तलवारींची एकूण किंमत २४ हजार रुपये असल्याची माहिती पोलिसांनी दिली.
या प्रकरणी अदनान खान सफदर खान पठाण या ३० वर्षीय तरुणाला पोलिसांनी अटक केली आहे. त्याच्याविरोधात हत्यार कायद्यानुसार गुन्हा दाखल करण्यात आला आहे.
दरम्यान, या तलवारी नेमक्या कोणत्या उद्देशाने घराच्या छतावर लपवून ठेवण्यात आल्या होत्या, याचा तपास नंदुरबार शहर पोलीस करत आहेत. प्रकरणाच्या पुढील तपासात आणखी काही माहिती समोर येते का, याकडे लक्ष लागले आहे.
