नाशिक : आगामी सण-उत्सवांच्या पार्श्वभूमीवर केंद्र सरकारने खाद्यतेलाच्या आयात शुल्कात कपात करण्याचा निर्णय घेतला आहे. बाजारात खाद्यतेलाचा तुटवडा जाणवू नये आणि वाढत्या महागाईवर नियंत्रण ठेवता यावे, हा या निर्णयामागचा उद्देश आहे. त्यामुळे येत्या काही दिवसांत सोयाबीन, सनफ्लॉवर आणि पामतेलाच्या किरकोळ दरात घट होण्याची शक्यता आहे.
नवरात्र, दसरा आणि दिवाळीच्या काळात फराळ, मिठाई तसेच विविध खाद्यपदार्थ तयार करण्यासाठी खाद्यतेलाची मागणी मोठ्या प्रमाणात वाढते. अशा वेळी दर नियंत्रणात आल्यास सर्वसामान्य ग्राहकांना मोठा दिलासा मिळू शकतो.
भारताची खाद्यतेलाची मागणी मोठी असून, देशांतर्गत गरजेपैकी सुमारे ५० ते ६० टक्के खाद्यतेल आयातीवर अवलंबून आहे. मलेशिया, इंडोनेशिया, अर्जेंटिना आणि ब्राझीलसारख्या देशांतून मोठ्या प्रमाणात तेल आयात केले जाते. त्यामुळे आंतरराष्ट्रीय बाजारातील दर आणि केंद्र सरकारचे आयात शुल्क धोरण याचा थेट परिणाम देशातील खाद्यतेलाच्या किमतीवर होतो.
आयात शुल्क कपातीमुळे कच्चे आणि रिफाईंड तेल आयात करणे तुलनेने स्वस्त होण्याची शक्यता असून, त्याचा फायदा पुढील काळात ग्राहकांना मिळण्याची अपेक्षा आहे.
