नाशिक :
नाशिक शहरातील वडाळा ते जीएम सिटी मार्गावर सतत सुरू असलेल्या पावसामुळे नाल्याला ओव्हरफ्लो होऊन रस्त्यावर मोठ्या प्रमाणात पाणी साचले आहे. यामुळे या मार्गावरील वाहतुकीवर परिणाम झाला असून वाहनचालक आणि पादचाऱ्यांना मोठ्या गैरसोयीचा सामना करावा लागत आहे.
मिळालेल्या माहितीनुसार, मुसळधार पावसामुळे नाल्यातील पाण्याचा प्रवाह वाढल्याने पाणी थेट रस्त्यावर आले. परिणामी, रस्ता जलमय झाला असून अनेक वाहनचालकांना सावधगिरीने वाहने चालवावी लागत आहेत. काही ठिकाणी पाण्यामुळे रस्त्यावरील खड्ड्यांचा अंदाज येत नसल्याने अपघाताचीही शक्यता निर्माण झाली आहे.
या जलसाच्यामुळे परिसरातील वाहतुकीचा वेग मंदावला असून पादचाऱ्यांनाही पाण्यातून मार्ग काढावा लागत आहे. स्थानिक नागरिकांनी प्रशासनाने तातडीने पाण्याचा निचरा करून आवश्यक उपाययोजना कराव्यात, अशी मागणी केली आहे.
सध्या या मार्गावरून प्रवास करणाऱ्या नागरिकांनी आणि वाहनचालकांनी आवश्यक ती खबरदारी घेण्याचे आवाहन करण्यात येत आहे.
