नाशिकमध्ये होणाऱ्या सिंहस्थ कुंभमेळा २०२७ च्या तयारीचा महाराष्ट्राचे राज्यपाल जिष्णू देव वर्मा यांनी आढावा घेतला. जिल्हा परिषद कार्यालयात झालेल्या बैठकीत कुंभमेळा प्राधिकरण, जिल्हा प्रशासन आणि विविध विभागांच्या अधिकाऱ्यांकडून सुरू असलेल्या विकासकामांची माहिती घेण्यात आली.
बैठकीदरम्यान कुंभमेळ्यासाठी राबविण्यात येत असलेल्या विविध प्रकल्पांचा आणि नियोजनाचा सविस्तर आढावा घेण्यात आला. विकासकामांची प्रगती, आवश्यक सुविधा आणि विविध विभागांमधील समन्वय यावर चर्चा करण्यात आली.
राज्यपालांनी कुंभमेळ्याशी संबंधित सर्व कामे विहित मुदतीत आणि उच्च दर्जाने पूर्ण करण्याचे निर्देश संबंधित यंत्रणांना दिले. तसेच देशभरातून येणाऱ्या भाविकांसाठी सुरक्षित, दर्जेदार आणि सुलभ सुविधा उपलब्ध करून देण्यावर भर देण्यात आला.
बैठकीत वाहतूक व्यवस्था, सुरक्षा नियोजन आणि कुंभमेळ्यादरम्यान आवश्यक असणाऱ्या मूलभूत सुविधांबाबतही चर्चा झाली. सिंहस्थ कुंभमेळा २०२७ चे नियोजन प्रभावी आणि वेळेत पूर्ण करण्यासाठी सर्व विभागांनी समन्वयाने काम करण्याच्या सूचना देण्यात आल्या.
