कुंभमेळ्याच्या पार्श्वभूमीवर सप्तशृंगगड ते नांदुरी रस्त्याच्या कॉंक्रिटीकरणाचे काम सुरू आहे. त्यामुळे या मार्गावर २६ सप्टेंबरपर्यंत मोठ्या वाहनांना तात्पुरती बंदी घालण्यात आली आहे. घाटातील धोकादायक वळणांवर रस्ते सुधारण्याचे काम वेगाने सुरू आहे.
या निर्बंधांमुळे एसटी महामंडळाने गडावर जाणाऱ्या मोठ्या बस नांदुरीपर्यंतच चालवण्याचा निर्णय घेतला आहे. त्यामुळे भाविकांना पुढील प्रवासासाठी पर्यायी वाहतूक व्यवस्थेचा वापर करावा लागणार आहे.
भाविकांची गैरसोय टाळण्यासाठी नांदुरी ते सप्तशृंगगडदरम्यान एसटीच्या छोट्या गाड्या चालवण्यात येणार आहेत. या पर्यायी व्यवस्थेमुळे गडावर जाणाऱ्या प्रवाशांना दिलासा मिळण्याची अपेक्षा आहे.
दरम्यान, अभोणा-कनाशी मार्गावरही रस्ता सुधारणेचे काम सुरू आहे. प्रवाशांनी एसटीच्या नवीन वेळापत्रकाची नोंद घेऊन प्रवासाचे नियोजन करावे, असे आवाहन करण्यात आले आहे.
