नाशिकच्या पाथरडी–दाढेगाव फरशी पुलावरून दुचाकीसह वाहून गेलेल्या तरुणाचा शोध अद्याप सुरू आहे. शोधमोहीमेदरम्यान एनडीआरएफची बोट नदीत पलटल्याची घटना घडली. बोटीत असलेले सहाही जवान सुरक्षित असून त्यांनी तात्काळ स्वतःचा बचाव केला. वेगवान पाण्याच्या प्रवाहामुळे ही घटना घडल्याची प्राथमिक माहिती समोर आली आहे. घटनास्थळी एनडीआरएफ, पोलीस आणि स्थानिक प्रशासनाकडून शोधकार्य सुरू आहे. दरम्यान, या पुलावर यापूर्वीही अनेक दुर्घटना घडल्याचा दावा ग्रामस्थांनी केला आहे. पुलाची उंची वाढवून कायमस्वरूपी उपाययोजना कराव्यात, अशी मागणी पुन्हा एकदा जोर धरू लागली आहे.