मतदार यादी अद्ययावत करण्यासाठी शनिवार-रविवारी विशेष मोहीम
मतदार यादी अद्ययावत करण्यासाठी शनिवार आणि रविवारी विशेष शिबिरांचे आयोजन करण्यात आले आहे. या मोहिमेद्वारे नागरिकांना मतदार यादीतील नाव तपासण्यासोबतच नवीन नोंदणी, नावातील दुरुस्ती आणि नाव वगळणीसाठी अर्ज करता येणार आहे.
विशेष शिबिरांमध्ये सकाळी १० ते सायंकाळी ६ वाजेपर्यंत बीएलओ मतदान केंद्रांवर उपस्थित राहणार आहेत. त्यामुळे नागरिकांनी आपल्या जवळच्या मतदान केंद्रावर जाऊन मतदार यादीतील नावाची खात्री करावी, असे आवाहन करण्यात आले आहे.
१८ वर्षे पूर्ण झालेल्या नवमतदारांसाठीही या मोहिमेत नोंदणीची संधी उपलब्ध करून देण्यात आली आहे. नवीन मतदार नोंदणीसाठी नमुना ६ भरून अर्ज करता येणार आहे.
तसेच मतदार यादीतील नाव, पत्ता किंवा इतर तपशीलात दुरुस्ती आवश्यक असल्यास संबंधित अर्ज करता येईल. पात्र नसलेल्या किंवा मृत व्यक्तींची नावे वगळण्यासाठीही अर्जाची सुविधा उपलब्ध आहे.
मतदार यादीसंदर्भातील दावे आणि हरकती ३० सप्टेंबरपर्यंत दाखल करता येणार आहेत. नागरिकांनी या संधीचा लाभ घेत आपले नाव मतदार यादीत आहे की नाही, तसेच नाव आणि इतर तपशील योग्य आहेत की नाही, याची खात्री करावी, असे आवाहन करण्यात आले आहे.
प्रवीण गेडाम यांनीही नागरिकांनी या विशेष मोहिमेत सहभागी होऊन मतदार यादी अद्ययावत करण्याचे आवाहन केले आहे.
