देहू | पुणे
देहू नगरीत जगद्गुरु संत तुकाराम महाराजांच्या पालखी प्रस्थान सोहळ्याला भक्तिमय वातावरणात सुरुवात झाली. हजारो वारकऱ्यांच्या उपस्थितीत टाळ-मृदुंगाच्या गजरात आणि विठ्ठलनामाच्या जयघोषात पालखी प्रस्थान सोहळा पार पडला.
यावेळी महाराष्ट्राच्या उपमुख्यमंत्री सुनेत्रा पवार यांनी सोहळ्याला उपस्थित राहून संत तुकाराम महाराजांच्या पादुकांचे दर्शन घेत नम्र अभिवादन केले. त्यांनी मंदिर संस्थानच्या पदाधिकाऱ्यांशी तसेच उपस्थित वारकऱ्यांशी संवाद साधत आषाढी वारीसाठी सर्व भाविकांना शुभेच्छा दिल्या.
सुनेत्रा पवार यांनी संत तुकाराम महाराजांचे विचार समाजाला एकता, समता आणि मानवतेचा संदेश देणारे असल्याचे सांगितले. वारी ही केवळ धार्मिक परंपरा नसून महाराष्ट्राच्या संस्कृतीचे आणि सामाजिक ऐक्याचे प्रतीक असल्याचेही त्यांनी नमूद केले.
पालखी सोहळ्यासाठी येणाऱ्या लाखो वारकऱ्यांच्या सोयी-सुविधा, आरोग्य, स्वच्छता, वाहतूक आणि सुरक्षेच्या दृष्टीने प्रशासनाने केलेल्या तयारीचीही त्यांनी माहिती घेतली.
भक्ती, परंपरा आणि उत्साहाने नटलेल्या या पालखी प्रस्थान सोहळ्यामुळे देहू नगरी पुन्हा एकदा विठ्ठलनामाच्या गजराने दुमदुमून गेली असून आषाढी वारीच्या प्रवासाला भक्तिमय सुरुवात झाली आहे.
