🌙 जुने नाशिक ईद-ए-मिलादनिमित्त झगमगलं! डीजेविना निघणार जुलूस | Nashik News | Apla Nashik

ईद-ए-मिलादनिमित्त जुने नाशिक झगमगले; डीजेविना जुलूस काढण्याचा निर्णय

नाशिक : ईद-ए-मिलादच्या पार्श्वभूमीवर जुने नाशिकसह शहरातील मुस्लिमबहुल परिसर आकर्षक विद्युत रोषणाई आणि सजावटीने उजळून निघाले आहेत. मुख्य रस्ते, चौक आणि परिसरात करण्यात आलेली आकर्षक सजावट नागरिकांचे लक्ष वेधून घेत आहे. ईद-ए-मिलाद उत्साहपूर्ण वातावरणात साजरा करण्यासाठी विविध ठिकाणी जय्यत तयारी करण्यात आली आहे.

जुने नाशिक परिसरातील चौक मंडई, बागवानपुरा, कथडा, मुलतानपुरा आणि फाळके रोड परिसरात आकर्षक सजावट करण्यात आली आहे. तसेच वडाळारोड परिसरातील नागजी, जयदीपनगर, चिश्तिया कॉलनी आणि मिल्लतनगर भागातही विद्युत रोषणाई करण्यात आली आहे. जुने नाशिकसह वडाळागाव, काझीनगर, अशोका मार्ग आणि पखालरोड परिसरातील मशिदींवरही आकर्षक विद्युत सजावट करण्यात आली आहे.

दरम्यान, ईद-ए-मिलादच्या जुलूसाच्या नियोजनासाठी शाही मशिदीत धर्मगुरू आणि उलेमांची बैठक पार पडली. या बैठकीत जुलूसाच्या आयोजनाबाबत विविध मुद्द्यांवर चर्चा करण्यात आली. यंदाच्या जुलूसमध्ये कोणत्याही ग्रुपकडून डीजेचा वापर केला जाणार नसल्याचा निर्णय घेण्यात आला आहे.

शांतता आणि शिस्तीचा संदेश देत डीजेविना जुलूस काढण्याचा निर्णय घेण्यात आला असून, ईद-ए-मिलाद उत्साहपूर्ण आणि शांत वातावरणात साजरा करण्यावर भर देण्यात येणार आहे.

बुधवारी दुपारी जुने नाशिकमधून जुलूस काढण्यात येणार असून, जुलूसमध्ये सहभागी होणाऱ्या वाहनांची शाही मशिदीत नोंदणी करणे आवश्यक असणार आहे. जुलूसाच्या पार्श्वभूमीवर आयोजक आणि प्रशासनाकडूनही आवश्यक नियोजन करण्यात आले आहे.

दरम्यान, ईद-ए-मिलादच्या निमित्ताने झालेली आकर्षक रोषणाई आणि सजावट यामुळे जुने नाशिकचा परिसर उत्सवी वातावरणात न्हाऊन निघाला आहे. शांतता, शिस्त आणि उत्साहपूर्ण वातावरणात ईद साजरी करण्यासाठी नागरिकांनी सहकार्य करावे, असे आवाहन करण्यात आले आहे.