🚨 गोदावरी स्वच्छतेच्या ₹2.43 कोटींच्या निविदेवरून वाद! अनुभवाची अट हटवल्याचा आरोप | Apla Nashik

नाशिकमध्ये गोदावरी नदीसह नंदिनी, वाघाडी आणि कपिला नदीच्या स्वच्छतेसाठी काढण्यात आलेल्या ₹2 कोटी 43 लाख 87 हजार रुपयांच्या निविदेवरून राजकीय वाद निर्माण झाला आहे. नदीपात्रातील पाणवेली, गाळ, कचरा आणि प्लास्टिक हटवण्यासाठी महापालिकेकडून ही निविदा काढण्यात आली आहे.

मात्र, या निविदेतील काही अटींवर शिवसेनेकडून आक्षेप घेण्यात आला आहे. सुरुवातीला निविदेत संबंधित संस्थेला किमान तीन वर्षांचा कामाचा अनुभव असण्याची अट ठेवण्यात आली होती. मात्र, नंतर ही अट हटवण्यात आल्याचा आरोप शिवसेनेचे विधानसभा नेते केशव पोहेदे यांनी केला आहे.

यासोबतच या संपूर्ण निविदा प्रक्रियेमागे एका मंत्र्याच्या पीएचा वरदहस्त असल्याचा गंभीर आरोपही करण्यात आला आहे. नदी स्वच्छतेच्या कामाच्या माध्यमातून संबंधित व्यक्तीकडून आर्थिक फायदा करून घेण्याचा प्रयत्न होत असल्याचा दावा शिवसेनेकडून करण्यात आला आहे. तसेच नदी स्वच्छतेच्या कामाच्या ठिकाणी संबंधित पीएने स्वतःचे फोटो सोशल मीडियावर शेअर केल्याचाही आरोप करण्यात आला आहे.

त्यामुळे ठेकेदाराला लाभ मिळवून देण्यासाठीच अनुभवाची अट हटवण्यात आली का? निविदा प्रक्रियेत नेमका कोणाचा फायदा होणार? आणि गोदावरी स्वच्छतेसाठी खर्च होणाऱ्या कोट्यवधी रुपयांच्या निधीच्या वापरात पारदर्शकता राखली जात आहे का? असे सवाल उपस्थित झाले आहेत.

दरम्यान, या प्रकरणातील आरोपांची अधिकृत बाजू आणि निविदा प्रक्रियेबाबत महापालिका प्रशासनाची भूमिका काय आहे, याकडे आता लक्ष लागले आहे.

आपलं नाशिक | आपला आवाज