नाशिक महानगरपालिकेच्या महासभेचे सध्याचे सभागृह आगामी काळात अपुरे पडण्याची शक्यता असून, त्याच्या विस्तारीकरणाचा निर्णय घेण्यात येणार आहे. महापालिकेत लवकरच १० स्वीकृत नगरसेवकांची नियुक्ती होणार असल्याने महापालिकेतील नगरसेवकांची एकूण संख्या १३२ होणार आहे. या पार्श्वभूमीवर १३२ नगरसेवकांना सभागृहात व्यवस्थित सामावून घेण्यासाठी महासभा सभागृहाचे विस्तारीकरण आणि नूतनीकरण करण्याची प्रक्रिया हाती घेतली जाणार असल्याची माहिती महापौर हिमगौरी आहेर-आडके यांनी दिली आहे.
सध्या अस्तित्वात असलेल्या महासभा सभागृहाच्या क्षमतेचा विचार करता, नगरसेवकांची संख्या वाढल्यानंतर आसनव्यवस्था, बैठक व्यवस्था आणि सभागृहातील इतर सुविधांमध्ये बदल करणे आवश्यक ठरणार आहे. त्यामुळे महापालिका प्रशासनाकडून सभागृहाची रचना, आसनव्यवस्था तसेच आवश्यक पायाभूत सुविधांचा आढावा घेऊन त्यानुसार विस्तार आणि नूतनीकरण करण्यात येणार आहे.
दरम्यान, आगामी सिंहस्थ कुंभमेळ्याच्या पार्श्वभूमीवर नाशिक महापालिकेतील महापौर आणि उपमहापौरांच्या दालनांचाही विस्तार करण्याचे नियोजन करण्यात आले आहे. सिंहस्थ काळात महापालिकेच्या प्रशासनावर तसेच लोकप्रतिनिधींच्या कामकाजावर वाढता ताण येण्याची शक्यता असल्याने कार्यालयीन पायाभूत सुविधांमध्ये आवश्यक सुधारणा करण्यावर भर दिला जात आहे.
नगरसेवकांची संख्या वाढणे आणि सिंहस्थ कुंभमेळ्याची तयारी या दोन्ही बाबी लक्षात घेता नाशिक महापालिकेच्या प्रशासकीय इमारतीतील सुविधांमध्ये आगामी काळात महत्त्वाचे बदल होण्याची शक्यता आहे. महासभा सभागृहाच्या विस्तारासोबतच महापौर-उपमहापौर दालनांच्या विस्ताराचे काम नेमक्या कोणत्या स्वरूपात आणि किती कालावधीत पूर्ण केले जाणार, याकडे आता नाशिककरांचे लक्ष लागले आहे.
नाशिक महापालिका, शहरातील प्रशासन आणि सिंहस्थ कुंभमेळ्याच्या तयारीशी संबंधित महत्त्वाच्या घडामोडींसाठी आपलं नाशिकला Subscribe करा आणि Bell Icon दाबा.
