नाशिकमध्ये सिंहस्थ महाकुंभ २०२७च्या पार्श्वभूमीवर आयोजित करण्यात आलेल्या तीन दिवसीय ‘कुंभ भक्ती संगम’ सोहळ्याचा भक्तिमय वातावरणात समारोप झाला. ठक्कर डोम परिसरात २८ ते ३० ऑगस्टदरम्यान रंगलेल्या या भव्य भक्ती महोत्सवात देशातील विविध भागांतील भक्ती परंपरा, कीर्तन आणि सांस्कृतिक सादरीकरणांचा अनोखा संगम पाहायला मिळाला.
समारोपाच्या दिवशी मणिपूरच्या पारंपरिक ‘नट संकीर्तन महाजेग्या’ने उपस्थित भाविकांना मंत्रमुग्ध केले. मणिपूरच्या समृद्ध सांस्कृतिक आणि आध्यात्मिक परंपरेचे दर्शन घडवणाऱ्या या सादरीकरणामुळे ठक्कर डोम परिसर भक्तिरसात न्हाऊन निघाला. पारंपरिक वाद्यांचा नाद, भक्तिगीते आणि कलाकारांचे सादरीकरण यामुळे वातावरण अधिकच भक्तिमय झाले.
यानंतर ह.भ.प. निवृत्ती महाराज इंदुरीकर यांच्या कीर्तनाने कार्यक्रमाला विशेष रंगत आली. आपल्या खास शैलीतून त्यांनी सिंहस्थ महाकुंभाचे आध्यात्मिक महत्त्व अधोरेखित करताना समाजाला स्वच्छता, सेवा, माणुसकी आणि सामाजिक बांधिलकीचा संदेश दिला. केवळ धार्मिक उत्सव म्हणून नव्हे, तर समाजाला सकारात्मक दिशा देणारा आणि माणसांना एकत्र आणणारा सोहळा म्हणून कुंभाकडे पाहण्याचे आवाहन त्यांच्या कीर्तनातून करण्यात आले.
सिंहस्थ महाकुंभ २०२७च्या पार्श्वभूमीवर आयोजित ‘कुंभ भक्ती संगम’मुळे नाशिकमध्ये देशभरातील विविध भक्ती परंपरांचा परिचय करून देण्याची संधी मिळाली. महाराष्ट्रासह देशातील विविध राज्यांच्या सांस्कृतिक आणि आध्यात्मिक परंपरांचा अनुभव या महोत्सवाच्या माध्यमातून भाविकांना घेता आला.
तीन दिवस चाललेल्या या भक्ती सोहळ्याला भाविकांचा उत्स्फूर्त प्रतिसाद मिळाला. भक्ती, संस्कृती आणि सामाजिक संदेश यांचा सुंदर मिलाफ घडवून आणणाऱ्या ‘कुंभ भक्ती संगम’चा समारोपही तितक्याच भक्तिमय वातावरणात झाला. मणिपूरच्या नट संकीर्तनापासून ते निवृत्ती महाराज इंदुरीकर यांच्या प्रभावी कीर्तनापर्यंत विविध कार्यक्रमांनी नाशिककर आणि भाविकांच्या मनात या सोहळ्याच्या आठवणी कायम राहतील.
