नाशिक शहरातील वाढत्या अतिक्रमणांच्या समस्येवर नियंत्रण मिळवण्यासाठी महानगरपालिकेने पुन्हा एकदा धडक मोहीम राबवली. संत सावता माळी चौक ते अपना बाजार तसेच रविशंकर मार्ग परिसरात अनधिकृत अतिक्रमणांवर कारवाई करत सार्वजनिक रस्ते आणि फुटपाथ अतिक्रमणमुक्त करण्यात आले. या कारवाईमुळे परिसरात काही काळ धावपळ उडाली, तर वाहतुकीसाठी रस्ते अधिक मोकळे झाले.
महापालिकेच्या अतिक्रमण विभागाने आयुक्तांच्या मार्गदर्शनाखाली ही विशेष मोहीम राबवली. वाहतूक आणि पादचाऱ्यांना अडथळा ठरणाऱ्या हातगाड्या, स्टॉल, फलक तसेच इतर अनधिकृत साहित्य हटवून जप्त करण्यात आले. कारवाईदरम्यान संबंधित विभागातील अधिकारी, कर्मचारी आणि पोलिस बंदोबस्तही तैनात करण्यात आला होता.
कारवाईत जप्त करण्यात आलेले साहित्य आडगाव येथील महापालिकेच्या गोडाऊनमध्ये जमा करण्यात आले. अनेक दिवसांपासून रस्ते आणि फुटपाथवरील अतिक्रमणांमुळे नागरिकांना गैरसोयीचा सामना करावा लागत होता. विशेषतः वर्दळीच्या भागात वाहतूक कोंडी, पादचाऱ्यांना चालण्यासाठी जागेचा अभाव आणि अपघाताचा धोका वाढत असल्याच्या तक्रारी सातत्याने येत होत्या.
महापालिका प्रशासनाने स्पष्ट केले आहे की, सार्वजनिक रस्ते आणि फुटपाथ अतिक्रमणमुक्त ठेवण्यासाठी अशा धडक कारवाया पुढेही नियमित सुरू राहणार आहेत. नियमांचे उल्लंघन करून पुन्हा अतिक्रमण करणाऱ्यांविरोधात कठोर कारवाई केली जाईल, असा इशाराही प्रशासनाने दिला आहे.
शहरातील प्रमुख रस्ते कायमस्वरूपी अतिक्रमणमुक्त राहावेत आणि वाहतूक सुरळीत व्हावी, अशी अपेक्षा आता नागरिकांकडून व्यक्त केली जात आहे.
