येवला शहरातील मिल्लत नगर परिसरात भटक्या कुत्र्यांनी अनेक मुलांवर हल्ला केल्याची घटना समोर आली आहे. या घटनेनंतर जखमी मुलांवर विविध रुग्णालयांमध्ये उपचार सुरू असून काहींना पुढील उपचारासाठी नाशिकला हलविण्यात आले आहे. या प्रकारानंतर नागरिकांमध्ये तीव्र संताप व्यक्त केला जात असून, भटक्या कुत्र्यांचा बंदोबस्त करण्यात नगरपालिका प्रशासन अपयशी ठरल्याचा आरोप करण्यात आला आहे. तातडीने उपाययोजना न झाल्यास आंदोलन छेडण्याचा इशाराही नागरिकांनी दिला आहे. तसेच भटके कुत्रे पकडून थेट नगरपालिकेत सोडण्याचा इशाराही काही नागरिकांनी व्यक्त केला. परिसरातील नागरिकांनी मुलांच्या सुरक्षिततेसाठी त्वरित कारवाई करण्याची मागणी केली आहे.