एससी प्रवर्गाचे अ-ब-क-ड वर्गीकरण करावे, या मागणीसाठी मातंग समाजाने मुंबईत मोर्चाची हाक दिली आहे. येत्या २९ सप्टेंबर रोजी मुंबईतील आझाद मैदानावर हा मोर्चा काढण्यात येणार आहे. या आंदोलनाच्या पार्श्वभूमीवर विविध भागांत बैठका घेऊन मोर्चाच्या तयारीला वेग देण्यात येत आहे.
जालना येथे सकल मातंग समाजाची बैठक पार पडली. या बैठकीत मुंबईतील मोर्चामध्ये मोठ्या संख्येने सहभागी होण्याचा निर्धार समाज बांधवांनी व्यक्त केला. एससी प्रवर्गातील अ-ब-क-ड वर्गीकरणाचा प्रश्न तातडीने मार्गी लावावा, अशी मागणी यावेळी करण्यात आली.
सरकारने या विषयावर वेळकाढूपणा न करता तातडीने वर्गीकरणाची प्रक्रिया करावी, अशी भूमिका बैठकीत मांडण्यात आली. मागणीच्या पूर्ततेसाठी २९ सप्टेंबर रोजी आझाद मैदानावर होणाऱ्या मोर्चात मोठ्या संख्येने समाज बांधवांनी सहभागी व्हावे, असे आवाहन करण्यात आले आहे.
दरम्यान, या मोर्चाच्या माध्यमातून मातंग समाजाच्या एससी प्रवर्गातील अ-ब-क-ड वर्गीकरणाच्या मागणीला पुन्हा एकदा व्यापक स्वरूप देण्याचा प्रयत्न केला जात आहे. आता शासन या मागणीबाबत कोणती भूमिका घेते आणि पुढील कार्यवाही काय होते, याकडे लक्ष लागले आहे.
