MPSC आंदोलनावरून राज्यातील राजकारण चांगलंच तापलं आहे. स्पर्धा परीक्षांची तयारी करणाऱ्या विद्यार्थ्यांच्या आंदोलनाच्या पार्श्वभूमीवर आता राजकीय प्रतिक्रिया उमटू लागल्या आहेत. अनिश गावंडे यांनी आंदोलन करणारे विद्यार्थी अँटी-नॅशनल नसून, आंदोलन करणे हा त्यांचा संविधानिक अधिकार आहे, अशी भूमिका मांडली आहे.
विद्यार्थ्यांच्या मागण्यांकडे सरकारने गांभीर्याने पाहण्याची गरज असल्याचे सांगत गावंडे यांनी MPSC आंदोलनाच्या मुद्द्यावरून सरकारवर निशाणा साधला. विद्यार्थ्यांच्या प्रश्नांवर चर्चा करून त्यांचे म्हणणे ऐकून घेण्याची मागणीही त्यांनी केली.
यासोबतच दुष्काळग्रस्त शेतकरी, ई-पिक अॅप आणि महाज्योती परीक्षेच्या मुद्द्यावरूनही अनिश गावंडे यांनी सरकारच्या भूमिकेवर प्रश्न उपस्थित केले. दुष्काळी परिस्थितीत शेतकऱ्यांच्या अडचणी, ई-पिक अॅपशी संबंधित प्रश्न तसेच महाज्योती परीक्षेतील विद्यार्थ्यांच्या अडचणी याकडे सरकारने लक्ष द्यावे, अशी भूमिका त्यांनी मांडली.
दरम्यान, MPSC आंदोलनाच्या मुद्द्यावरून राज्यातील राजकीय वातावरण चांगलेच तापले असून, विद्यार्थ्यांच्या मागण्यांवर सरकारकडून काय भूमिका घेतली जाते, याकडे आता लक्ष लागले आहे.
