संजय राऊत यांनी एप्रिलमध्ये ‘रिजीम चेंज’ होणार असल्याचे म्हटल्याच्या पार्श्वभूमीवर परिणय फुके यांनी उद्धव ठाकरे यांच्या पक्षाध्यक्षपदाबाबत मोठा दावा केला. उद्धव ठाकरे यांचे अध्यक्षपद जाऊन संजय राऊत हे पद मिळवण्यासाठी बंडखोरी करतील, असे भाकीत फुके यांनी केले. नरेंद्र मोदी देशाचे नेतृत्व करत असताना उद्धव ठाकरे आणि संजय राऊत यांच्यासारखे नेते सत्ताबदल घडवू शकणार नाहीत, अशी टीकाही त्यांनी केली.
शिवसेना नेते रामदास कदम यांनी मुख्यमंत्रीपदाबाबत केलेल्या वक्तव्यावरही परिणय फुके यांनी प्रतिक्रिया दिली. प्रत्येक कार्यकर्त्याला आपला नेता मुख्यमंत्री व्हावा, असे वाटत असते. त्यामुळे रामदास कदम यांच्या वक्तव्यात काहीही गैर नसल्याचे फुके म्हणाले. महाराष्ट्रात भाजपच्या पाठिंब्याशिवाय मुख्यमंत्री होऊ शकत नाही आणि भविष्यातही भाजपचाच मुख्यमंत्री होईल, असा दावाही त्यांनी केला.
मराठा आरक्षण आंदोलक मनोज जरांगे पाटील यांच्यावरही परिणय फुके यांनी टीका केली. जरांगे यांची लोकप्रियता कमी होत असल्याने ते राजकीय नेत्यांवर आरोप करत असल्याचा दावा फुके यांनी केला. राजकीय वक्तव्यांऐवजी त्यांनी मराठा समाजाच्या प्रश्नांवर लक्ष केंद्रित करावे, असा सल्लाही फुके यांनी दिला.
परिणय फुके यांनी उद्धव ठाकरे, संजय राऊत आणि मनोज जरांगे पाटील यांच्या संदर्भात केलेल्या या वक्तव्यांमुळे राज्यातील राजकीय वर्तुळात चर्चा सुरू झाली आहे.
