नाशिकच्या सिडको परिसरात वाहनांचा वेग नियंत्रित करण्यासाठी बसविण्यात आलेले नवीन गतिरोधक अवघ्या महिनाभरातच तुटल्याचे समोर आले आहे. या कामावर लाखो रुपयांचा खर्च करण्यात आल्याचे सांगितले जात असून, गतिरोधकांच्या गुणवत्तेबाबत नागरिकांनी प्रश्न उपस्थित केले आहेत.
शाळा, महाविद्यालये, रुग्णालये आणि वर्दळीच्या रस्त्यांवर बसविण्यात आलेले अनेक गतिरोधक तुटून त्यांचे तुकडे रस्त्यावर विखुरले आहेत. त्यामुळे वाहनचालकांना वाहतुकीदरम्यान अडचणींचा सामना करावा लागत असून, अपघाताचा धोका वाढल्याची तक्रार स्थानिकांनी केली आहे.
नागरिकांनी संबंधित कामात निकृष्ट दर्जाचे साहित्य वापरण्यात आल्याचा आरोप केला आहे. या प्रकरणाची सखोल चौकशी करून संबंधित ठेकेदारावर योग्य कारवाई करावी, अशी मागणी करण्यात आली आहे.
तसेच तुटलेले गतिरोधक तातडीने दुरुस्त करून वाहतूक सुरक्षित करावी, अशी मागणी नागरिकांनी प्रशासनाकडे केली आहे. या प्रकरणी संबंधित यंत्रणेकडून पुढील कार्यवाहीची प्रतीक्षा आहे.
