श्रावण महिन्यातील सोमवार हा भगवान महादेवाच्या भक्तांसाठी विशेष महत्त्वाचा मानला जातो. त्यामुळे तिसऱ्या श्रावणी सोमवारी त्र्यंबकेश्वर ज्योतिर्लिंगाच्या दर्शनासाठी महाराष्ट्रासह विविध भागांतून मोठ्या संख्येने भाविक त्र्यंबकेश्वरमध्ये दाखल झाले. मंदिर परिसरात दर्शनासाठी लांबच लांब रांगा लागल्या होत्या.
भाविकांच्या गर्दीमुळे त्र्यंबकेश्वर नगरीतील प्रमुख रस्ते आणि मंदिर परिसरात मोठी वर्दळ पाहायला मिळाली. ठिकठिकाणी ‘हर हर महादेव’ आणि ‘बम बम भोले’च्या जयघोषाने भक्तिमय वातावरण निर्माण झाले होते. दर्शनासाठी आलेल्या भाविकांमध्ये मोठा उत्साह पाहायला मिळाला.
भगवान त्र्यंबकेश्वराच्या दर्शनासोबतच ब्रह्मगिरी प्रदक्षिणेसाठीही भाविकांची मोठी गर्दी झाली. श्रावण सोमवारच्या निमित्ताने धार्मिक विधी, पूजा-अर्चा आणि दर्शनासाठी भाविकांची मोठी उपस्थिती राहिली.
दरम्यान, एवढ्या मोठ्या प्रमाणात भाविक त्र्यंबकेश्वरमध्ये दाखल झाल्याने प्रशासन आणि पोलिसांसमोर गर्दी नियंत्रणाचे मोठे आव्हान निर्माण झाले. वाढती गर्दी लक्षात घेऊन वाहतूक व्यवस्था सुरळीत ठेवण्यासाठी तसेच भाविकांची सुरक्षितता आणि गर्दी नियंत्रणासाठी विशेष उपाययोजना करण्यात आल्या. पोलिसांचा कडेकोट बंदोबस्त तैनात करण्यात आला असून, प्रमुख ठिकाणी वाहतूक नियोजनावर भर देण्यात आला.
तिसऱ्या श्रावणी सोमवारी त्र्यंबकेश्वरमध्ये झालेली ही विक्रमी गर्दी पाहता संपूर्ण परिसरात दिवसभर उत्साहाचे आणि भक्तिमय वातावरण राहिले. महादेवाच्या दर्शनासाठी आलेल्या लाखो भाविकांमुळे त्र्यंबकेश्वर नगरीने जणू भक्तीचे विराट रूप धारण केले.
आपलं नाशिक | आपला आवाज
