गोदावरी नदीच्या वाढलेल्या प्रवाहातही नाशिकच्या रामकुंड परिसरात काही नागरिक नदीकाठी उतरून वाहने धुत असल्याचे चित्र समोर आले आहे. निसरडा दगडी किनारा, खोल पाणी आणि वेगवान प्रवाहामुळे हा प्रकार अत्यंत धोकादायक ठरत असल्याची चिंता व्यक्त केली जात आहे. तोल गेल्यास किंवा पाय घसरल्यास गंभीर अपघात होण्याची शक्यता नाकारता येत नाही. धार्मिक दृष्ट्या महत्त्वाच्या रामकुंड परिसरात दररोज मोठ्या संख्येने भाविक येत असल्याने इतरांच्या सुरक्षिततेचाही प्रश्न निर्माण होत आहे. प्रशासनाने तातडीने प्रतिबंधात्मक उपाययोजना कराव्यात आणि नागरिकांनी स्वतःचा जीव धोक्यात न घालता सुरक्षिततेचे भान ठेवावे, असे आवाहन करण्यात येत आहे.