नाशिक शहरातील शरणपूर रोडवरील रस्त्यांच्या दुरवस्थेचा प्रश्न पुन्हा एकदा ऐरणीवर आला आहे. शरणपूर सिग्नलपासून रचना विद्यालयाकडे जाणाऱ्या मार्गावर मोठ्या प्रमाणात खड्डे पडल्याने वाहनचालक, पादचारी आणि स्थानिक नागरिकांना दररोज गैरसोयीचा सामना करावा लागत आहे.
स्थानिकांच्या म्हणण्यानुसार, या रस्त्यावरील खड्डे अवघ्या दोन दिवसांपूर्वीच बुजविण्यात आले होते. मात्र, अल्पावधीतच रस्ता पुन्हा उखडल्याने केलेल्या कामाच्या गुणवत्तेबाबत प्रश्नचिन्ह निर्माण झाले आहे. रस्त्यावर सुमारे ४० ते ५० खड्डे पडल्याचा दावा नागरिकांनी केला असून, पावसामुळे त्यामध्ये पाणी साचत असल्याने अपघाताचा धोका अधिक वाढला आहे.
रस्त्याच्या खराब अवस्थेबद्दल संतप्त प्रतिक्रिया व्यक्त करत काही नागरिकांनी, "हा अपघात नाही... हा मर्डर आहे," अशा शब्दांत प्रशासनाविरोधात नाराजी व्यक्त केली. वारंवार तात्पुरती डागडुजी करण्याऐवजी रस्त्याची कायमस्वरूपी आणि दर्जेदार दुरुस्ती करावी, अशी मागणीही त्यांनी केली आहे.
शहरातील प्रमुख मार्गांपैकी असलेल्या या रस्त्याची तातडीने दुरुस्ती करून सुरक्षित वाहतूक व्यवस्था उपलब्ध करून द्यावी, अशी अपेक्षा नागरिकांकडून व्यक्त होत आहे.
