त्र्यंबकेश्वर तालुक्यातील भिलमाळ आश्रमशाळेतील विद्यार्थ्यांनी श्रावण महिन्यानिमित्त अनोखा आणि कल्पक उपक्रम राबवत सर्वांचे लक्ष वेधून घेतले आहे. परिसरात सहज उपलब्ध होणाऱ्या साध्या दगडांवर रंगकाम करत विद्यार्थ्यांनी आकर्षक शिवलिंग साकारली आहेत. या उपक्रमातून विद्यार्थ्यांच्या कलागुणांना भक्तीची जोड मिळाली आहे.
महागडे साहित्य किंवा विशेष साधनसामग्रीचा वापर न करता उपलब्ध साधनांचा उपयोग करून विद्यार्थ्यांनी विविध आकारांच्या दगडांना रंग आणि कलात्मक स्पर्श दिला. साध्या दगडांना सुंदर स्वरूप देत विद्यार्थ्यांनी शिवलिंगांच्या आकर्षक कलाकृती तयार केल्या आहेत.
श्रावण महिन्याच्या पार्श्वभूमीवर राबवण्यात आलेल्या या उपक्रमातून विद्यार्थ्यांची कल्पकता, सर्जनशीलता आणि कलात्मक कौशल्य पाहायला मिळत आहे. आदिवासी पाड्यावरील विद्यार्थ्यांना आपल्या कलागुणांना व्यक्त करण्यासाठी मिळालेलं हे व्यासपीठ त्यांच्या आत्मविश्वासाला चालना देणारं ठरत आहे.
शिक्षक आणि शाळेतील कर्मचाऱ्यांच्या मार्गदर्शनातून हा उपक्रम यशस्वी करण्यात आला. विद्यार्थ्यांनी स्वतःच्या कल्पनेतून साध्या दगडांवर रंगकाम करत शिवरूप साकारलं. त्यामुळे या कलाकृतींना धार्मिक भावनेसोबतच सर्जनशीलतेचीही जोड मिळाली आहे.
विद्यार्थ्यांनी साकारलेल्या शिवलिंगांनी आश्रमशाळेतील परिसराचे वातावरणही भक्तिमय आणि आकर्षक केले आहे. उपलब्ध साधनांमधूनही कल्पकतेला वाव दिल्यास सुंदर कलाकृती साकारता येतात, हा संदेश या उपक्रमातून मिळत आहे.
भिलमाळ आश्रमशाळेतील विद्यार्थ्यांच्या या उपक्रमाचे कौतुक होत असून, ग्रामीण आणि आदिवासी भागातील विद्यार्थ्यांच्या कलागुणांना प्रोत्साहन देण्यासाठी अशा उपक्रमांचे आयोजन महत्त्वाचे ठरत आहे.
