शहरात गॅस लाईन टाकण्याच्या एमएनजीएलच्या कामकाजावर आमदार देवयानी फरांदे यांनी तीव्र नाराजी व्यक्त केली आहे. नियोजनशून्य कामामुळे शहरभर रस्ते खोदून ठेवण्यात आल्याने नागरिकांना मोठा त्रास सहन करावा लागत असल्याचा आरोप त्यांनी केला. शहरासाठी लाखो गॅस कनेक्शनचे उद्दिष्ट असताना आतापर्यंत अपेक्षित काम पूर्ण झाले नसल्याचाही दावा करण्यात आला. महापालिकेतील आढावा बैठकीत एमएनजीएलच्या कामकाजावर प्रश्नचिन्ह उपस्थित करत रस्ते दुरुस्तीला प्राधान्य देण्याची मागणी करण्यात आली. कामाची पद्धत न बदलल्यास नागरिकांचा रोष वाढेल, असा इशाराही यावेळी देण्यात आला.