नाशिकच्या बाजारपेठेत आंबेमोहोर तांदळाच्या दरात सातत्याने वाढ होत आहे. चव, सुगंध आणि गुणवत्तेमुळे ग्राहकांची विशेष पसंती असलेल्या या तांदळाचा दर आता १६५ रुपये किलोपर्यंत पोहोचला आहे. दरवाढीचा फटका ग्राहकांच्या खिशाला बसत असला, तरी आंबेमोहोरची मागणी मात्र कायम असल्याचे व्यापाऱ्यांकडून सांगण्यात येत आहे.
सुरुवातीला आंबेमोहोर तांदळाचा दर १०१ रुपये किलो इतका होता. मात्र काही दिवसांतच दरात मोठी वाढ झाली. अवघ्या बारा दिवसांत हा दर १२० रुपये किलोवर पोहोचला. त्यानंतर फेब्रुवारी महिन्यात दर १४० रुपये किलो, तर मे महिन्यात १६५ रुपये किलोपर्यंत वाढ झाली.
सध्या ३० किलोच्या आंबेमोहोर तांदळाच्या कट्ट्यासाठी ग्राहकांना सुमारे ५ हजार रुपये मोजावे लागत आहेत. वाढत्या दरामुळे ग्राहकांच्या खर्चात वाढ झाली असली, तरी तांदळाची गुणवत्ता आणि पारंपरिक चव यामुळे मागणी कमी झालेली नाही.
आंबेमोहोर तांदळाचे उत्पादन प्रामुख्याने पश्चिम बंगालमधील कोलकाता परिसर आणि महाराष्ट्रातील चंद्रपूर जिल्ह्यात मोठ्या प्रमाणात होते. नाशिकच्या बाजारात या तांदळाला विशेष मागणी आहे.
व्यापाऱ्यांच्या मते, आंबेमोहोरचा सुगंध, मऊपणा आणि चवीमुळे अनेक ग्राहक या तांदळाला प्राधान्य देतात. त्यामुळे दर वाढले तरी ग्राहकांची पसंती कायम आहे.
दरम्यान, वाढत्या दरामुळे सर्वसामान्य ग्राहकांच्या बजेटवर परिणाम होत असून भविष्यात दर स्थिर होणार का, याकडे ग्राहकांचे लक्ष लागले आहे.
