नाशिकच्या बाजारपेठेत कांद्याची आवक घटल्याने कांद्याच्या दरात पुन्हा एकदा वाढ झाली आहे. किरकोळ बाजारात कांद्याचा दर ५० ते ६० रुपये किलोपर्यंत पोहोचला असून, त्यामुळे सर्वसामान्यांच्या स्वयंपाकघराचे बजेट वाढण्याची शक्यता आहे.
नाशिकच्या घाऊक बाजारात कांद्याचे दर ४५ ते ५२ रुपये प्रतिक्विंटलपर्यंत पोहोचल्याची माहिती आहे. मध्यम प्रतीच्या कांद्याला ४ हजार १०० रुपयांपर्यंत भाव मिळत असून, बाजार समितीत कांद्याला ४ हजार ५०० रुपयांपर्यंत दर मिळत असल्याचे सांगण्यात येत आहे.
चाळींमध्ये साठवून ठेवलेला कांदा खराब झाल्याने दर्जेदार कांद्याची उपलब्धता कमी झाली आहे. त्यामुळे बाजारात चांगल्या प्रतीच्या कांद्याची टंचाई निर्माण झाली असून, त्याचा थेट परिणाम दरांवर होत आहे.
दर आणखी वाढण्याच्या अपेक्षेने काही शेतकऱ्यांकडून कांदा बाजारात आणण्याऐवजी रोखून ठेवला जात असल्याचेही सांगितले जात आहे. नवीन कांद्याची आवक वाढेपर्यंत बाजारातील तेजी कायम राहण्याची शक्यता व्यक्त केली जात आहे.
दरम्यान, कांद्याचे वाढते दर नियंत्रणात ठेवण्यासाठी केंद्र सरकारकडून व्यापाऱ्यांच्या कांदा साठ्यावर निर्बंध आणण्याच्या हालचाली सुरू असल्याची चर्चा आहे. यामुळे आगामी काळात कांद्याच्या दरावर काय परिणाम होतो, याकडे शेतकरी आणि ग्राहकांचे लक्ष लागले आहे.
कांद्याच्या दरवाढीमुळे शेतकऱ्यांना चांगला भाव मिळण्याची शक्यता असली तरी ग्राहकांना मात्र महागाईचा फटका बसत आहे. नवीन कांद्याची आवक बाजारात वाढल्यानंतरच दर काही प्रमाणात स्थिर होण्याची शक्यता आहे.
