नाशिक शहरातील मुंबईनाका ते वडाळानाका मार्गावर अनधिकृत पार्किंगमुळे वाहतूक कोंडीची समस्या गंभीर बनली आहे. सर्व्हिस रोडच्या दोन्ही बाजूंना बेशिस्तपणे उभी केली जाणारी वाहने वाहनचालकांसाठी मोठा अडथळा ठरत आहेत. त्यामुळे या मार्गावरून प्रवास करणाऱ्या नागरिकांना दररोज वाहतूक कोंडीचा सामना करावा लागत आहे.
मुंबईनाका ते वडाळानाका सर्व्हिस रोडवर दुचाकी आणि चारचाकी वाहनांचे अनधिकृत पार्किंग मोठ्या प्रमाणात वाढले आहे. रस्त्याच्या दोन्ही बाजूंना वाहने उभी राहत असल्याने वाहनांना जाण्यासाठी कमी जागा उपलब्ध होते. परिणामी या मार्गावर वाहतुकीचा वेग मंदावला असून अनेक वेळा कोंडीची परिस्थिती निर्माण होते.
या परिसरात हॉटेल्स, शोरूम्स आणि खासगी रुग्णालयांची संख्या मोठी आहे. मात्र अनेक ठिकाणी पुरेशी पार्किंग व्यवस्था नसल्याने नागरिकांकडून वाहने थेट रस्त्यावर उभी केली जात आहेत. याचा परिणाम सर्व्हिस रोडच्या वाहतुकीवर होत आहे.
विशेषतः रुग्णालय परिसर असल्याने रुग्णवाहिकांनाही या कोंडीचा फटका बसत आहे. आपत्कालीन परिस्थितीत रुग्णवाहिकांना मार्ग काढताना अडचणी येत असल्याचे चित्र आहे.
संध्याकाळच्या वेळी वाहनांची संख्या वाढल्याने वाहतूक कोंडी आणखी गंभीर होते. त्यातच द्वारका परिसरातील सुरू असलेल्या रस्ते कामांमुळे वाहतुकीवर आधीच अतिरिक्त ताण निर्माण झाला आहे.
अनधिकृत पार्किंगवर तातडीने कारवाई करून मुंबईनाका-वडाळानाका मार्गावरील वाहतूक सुरळीत करावी, अशी मागणी वाहनचालक आणि नागरिकांकडून होत आहे. आता वाहतूक पोलिसांकडून या समस्येवर कोणती कारवाई केली जाते, याकडे लक्ष लागले आहे.
