उपवासाच्या दिवसांत नेहमी काय खावे, हा प्रश्न अनेकांना पडतो. अशा वेळी चविष्ट, पोटभर आणि घरच्या घरी सहज तयार करता येणाऱ्या पदार्थांचा पर्याय म्हणून राजगिऱ्याचा शिरा आणि उपवासाचं भाजणी थालीपीठ या दोन रेसिपीज खास ठरू शकतात.
‘आपलं नाशिक | आपला डायट’ या कार्यक्रमात डायटिशियन पूजा देवरे यांनी उपवासासाठी तयार करता येणाऱ्या या दोन पदार्थांची माहिती दिली आहे.
राजगिऱ्याचा शिरा
उपवासात गोड खाण्याची इच्छा होत असेल तर राजगिऱ्याचा शिरा हा झटपट तयार होणारा पर्याय आहे. हा पदार्थ तयार करण्यासाठी राजगिऱ्याचे पीठ, तूप, ड्रायफ्रूट पावडर, गूळ आणि पाण्याचा वापर केला जातो.
कढईमध्ये तूप गरम करून त्यात राजगिऱ्याचे पीठ खमंग भाजून घेतले जाते. त्यानंतर पाणी घालून पीठ शिजवले जाते. आवश्यकतेनुसार गूळ, जायफळ आणि ड्रायफ्रूट पावडर घालून काही वेळ वाफ दिल्यानंतर राजगिऱ्याचा स्वादिष्ट शिरा तयार होतो.
उपवासाचं भाजणी थालीपीठ
गोड पदार्थानंतर उपवासासाठी तिखट आणि पोटभर पर्याय म्हणून भाजणीचे थालीपीठ तयार करता येते. यासाठी राजगिऱ्याचे पीठ, भगरीचे पीठ आणि शिंगाड्याचे पीठ समप्रमाणात घेतले जाते.
या पिठामध्ये हिरवी मिरची, कोथिंबीर, जिरे आणि चवीनुसार मीठ घालून मिश्रण तयार केले जाते. आवडीनुसार शेंगदाण्याचे कूटही घालता येते. तयार पीठ मळून त्याचे थालीपीठ थापून तव्यावर तुपामध्ये खमंग भाजले जाते.
हे थालीपीठ दह्यासोबत किंवा हिरवी मिरची आणि कोथिंबिरीच्या ठेच्यापासून तयार केलेल्या चटणीसोबत खाता येते. त्यामुळे उपवासात चविष्ट आणि पोटभर पर्याय उपलब्ध होतो.
उपवासाच्या दिवसांत एकसारखे पदार्थ खाण्याऐवजी अशा विविध रेसिपीजचा समावेश करून जेवणात बदल करता येऊ शकतो. राजगिऱ्याचा गोड शिरा आणि खमंग उपवासाचं थालीपीठ या दोन्ही रेसिपीज घरच्या घरी सहज ट्राय करता येतील.
अशाच सोप्या, चविष्ट आणि विविध रेसिपीज जाणून घेण्यासाठी पाहत राहा ‘आपलं नाशिक | आपला डायट’.
आपलं नाशिक | आपला आवाज
