सटाणा :सटाण्याच्या आदिवासी शासकीय वसतिगृहातील विद्यार्थ्यांना निकृष्ट दर्जाचा आहार दिला जात असल्याचा गंभीर आरोप विद्यार्थ्यांनी केला आहे. वसतिगृहात किडे आणि अळ्या पडलेला नाश्ता, तसेच सडलेली फळे दिली जात असल्याचा दावा विद्यार्थ्यांनी केला आहे.
यासोबतच शैक्षणिक साहित्याची कमतरता आणि स्वच्छतेचा अभाव असल्याने विद्यार्थ्यांमध्ये नाराजी निर्माण झाली आहे. वसतिगृहातील मूलभूत सुविधांकडे प्रशासनाचे दुर्लक्ष होत असल्याचा आरोपही विद्यार्थ्यांनी केला आहे.
या समस्यांकडे प्रशासनाचे लक्ष वेधण्यासाठी विद्यार्थ्यांनी सटाणा ते कळवण असा तब्बल ३० किलोमीटरचा पायी मोर्चा काढला.
मोर्चादरम्यान विद्यार्थ्यांनी आपल्या विविध मागण्या मांडत प्रशासनाकडून तातडीने उपाययोजना करण्याची मागणी केली. वसतिगृहातील आहाराची गुणवत्ता, स्वच्छता, शैक्षणिक साहित्य आणि इतर मूलभूत सुविधांबाबत विद्यार्थ्यांनी नाराजी व्यक्त केली.
मागण्या पूर्ण होईपर्यंत आंदोलन मागे घेणार नसल्याचा पवित्रा विद्यार्थ्यांनी घेतला आहे. त्यामुळे या आंदोलनाकडे प्रशासनाचे लक्ष लागले आहे.
दरम्यान, विद्यार्थ्यांनी केलेल्या आरोपांची संबंधित प्रशासनाकडून तपासणी आणि प्रत्यक्ष पाहणी होणे महत्त्वाचे ठरणार आहे. वसतिगृहातील भोजनाची गुणवत्ता, स्वच्छता आणि विद्यार्थ्यांना उपलब्ध करून दिल्या जाणाऱ्या सुविधांबाबत प्रशासन कोणती भूमिका घेते, याकडे आता लक्ष आहे.
