नाशिक येथील महाराष्ट्र आरोग्य विज्ञान विद्यापीठाचा (एमयूएचएस) २५ वा दीक्षांत समारंभ राज्यपाल तथा कुलपती जिष्णु देव वर्मा यांच्या अध्यक्षतेखाली उत्साहात पार पडला. विविध आरोग्य शाखांतील विद्यार्थी, संशोधक आणि मान्यवरांच्या उपस्थितीत हा समारंभ आयोजित करण्यात आला.
समारंभात २० संशोधकांना पीएच.डी. पदवी प्रदान करण्यात आली. तसेच वैद्यकीय आणि आरोग्य विज्ञानाच्या विविध शाखांतील ९९ गुणवंत विद्यार्थ्यांचा सुवर्णपदके आणि प्रमाणपत्रे देऊन गौरव करण्यात आला.
याच सोहळ्यात आयुर्वेद क्षेत्रातील उल्लेखनीय योगदानाची दखल घेत ज्येष्ठ आयुर्वेद तज्ज्ञ डॉ. सदानंद सरदेशमुख यांना विद्यापीठाचा सर्वोच्च डी.लिट. सन्मान प्रदान करण्यात आला.
या दीक्षांत समारंभातून शैक्षणिक गुणवत्ता, संशोधन आणि आरोग्य क्षेत्रातील योगदानाचा गौरव करण्यात आला. विविध क्षेत्रांत उल्लेखनीय कामगिरी करणाऱ्या विद्यार्थ्यांसह संशोधकांचा सन्मान हा सोहळ्याचे प्रमुख आकर्षण ठरला.
